زاخۆ, باژێره‌كێ كه‌ڤنێ به‌رنیاسه و د ژێده‌رێن گریكیدا به‌حسێ وێ هاتیه كرن، ل گۆره‌ى جهێ وێ یێ ستراتیژى، سه‌رسنور بوویه. سه‌نته‌ره‌كێ بازرگانى و هژماره‌كا زۆر یا پیشه‌سازى و وه‌به‌رهێنانێ هه‌مبێزكریه. باژێرێ زاخۆ نه‌بتنێ خزمه‌تا كوردستانێ كریه، به‌لكو خزمه‌تا پتریا ده‌ڤه‌رێن عێراقێ و ملله‌تێن ده‌وروبه‌رێ هه‌رێمێ ژى كریه، سه‌ره‌ڕاى هندێ كو هه‌بوونا زانكۆیه‌كێ ل باژێرێ زاخۆ دێ هاریكار بیت بۆ پێشڤه‌برنا ژیانێ ژ هه‌مى ئالیانڤه. زێده‌بارى هندێ كو زانكۆیا زاخۆ هێشتا یا ساڤایه – لسالا 2010 ێ هاتى یه دامه‌زراندن – لێ ئاسته‌كێ به‌رزێ زانستێ و پروگرامێن ئارمانجدار بۆ قوتابیان و ده‌رچوویان ب خوڤه دیتیه. سه‌نته‌رێن ڤه‌كولینێن زانستى ب هه‌مى پێدڤیێن ڤه‌كولینێ هاتینه به‌رهه‌ڤكرن داكو ببنه فاكته‌ر بۆ هه‌مى كریارێن زانستى ل ده‌ڤه‌رێ .
بڤێ چه‌ندێ ئاماده‌كرنا ڤێ دورهێلا زانستیا گونجاى و هه‌بوونا سه‌نته‌رێن زانستى و فێركرنێ یێن ناڤهاتى، دێ د هاریكار بن بۆ كادرێن زانستى كو لدویڤ ئاریشێن ڤه‌كولینێن په‌یوه‌ند ب ژیانێ، ژینگه‌هێ، پێشه‌سازى، كه‌لتورى، شارستانى... هتد، بچن و د ئه‌نجامدا، مفایێ وێ دێ بۆ باژێرێ زاخۆ و هه‌رێما كوردستانێ زڤریت .
ل بن ڕوناهیا بوچوونێن هاتینه به‌رچاڤكرن و ژ بۆ دیاركرنا كارتێكرنا زانكۆیێ لسه‌ر باژێرێ زاخۆ د (كه‌ڤن، نوكه و پاشه‌روژێ) دا و چه‌وانیا به‌رهه‌ڤكرنا نه‌خشه‌كى كو ب ڕێكا وێ زانكۆ خزمه‌تا وه‌لاتیان بكه‌ت، زانكۆیا زاخۆ پێخوشه كو ڕابگه‌هینیت ب ڕابوونا كونفرانسێ زانستیێ دوویێ، بناڤونیشانێ: ( زاخۆ: ژیان، شارستانى و كه‌لتوور) دناڤ كه‌مپا زانكۆیێدا .
لژنا ئاماده‌كار به‌شداربوونا زانا و ڤه‌كوله‌ران دنرخینیت، یێن ڤه‌كولین و ڤه‌خواندنان پێشكه‌ش بكه‌ن، بتایبه‌ت یێن په‌یوه‌ند ب باژێرێ زاخۆ ڤه، د بیاڤێن: ژینگه‌ه، مێژوو، ڤه‌كولینێن مرۆڤایه‌تى، زانستێن ئه‌ندازیارى و په‌ترولێ، زانست، هونه‌ر، په‌روه‌رده، كارگێرى و ئابوورى... هتد.
ڤه‌كولینێن زانستى دێ هێنه شاندن بۆ لژنێن زانستى ب مه‌ره‌ما هه‌لسه‌نگاندنێ و ب شێوێ سمینار دێ هێنه پێشكێشكرن، چ ب زاره‌كى یا فلیكس بن، هه‌روه‌سا چه‌ندین گه‌نگه‌شه دێ لسه‌ر بابه‌تێن گرنگ هه‌بن، وۆركشوپ، پێشانگه‌ه، چالاكیێن ناڤخۆیى.
